Þann 20.maí 2011 verður sýningin "Fornleifar í Þingeyjarsýslum" opnuð á jarðhæð Safnahússins.

Á síðustu árum hafa víðtækar og umfangsmiklar fornleifarannsóknir farið fram í Þingeyjarsýslum. Með rannsóknum þessum hefur eflst þekking á búsetu fyrr á öldum – ekki síst á söguöld og fengist skýrari mynd af því hvernig fólk lifði fyrir um 1000 árum.

Markmið sýningarinnar er að birta yfirlit yfir helstu fornleifarannsóknir í Þingeyjarsýslum, með sérstakri áherslu á síðustu 25 árin og efla áhuga fólks á fornminjum á svæðinu. Á sýningunni verða fornmunir sem fundist hafa við fornleifarannsóknir í héraðinu. Bátkumlið á Litlu Núpum í Aðaldal sem fannst árið 2007 er afar merkur fornleifafundur og er á sýningunni fjallað sérstaklega um hann.

Að sýningunni standa Menningarmiðstöð Þingeyinga, Hið þingeyska fornleifafélag og Fornleifastofnun Íslands. Sýningarstjórar eru Sigrún Kristjánsdóttir, Guðrún Alda Gísladóttir, Ásgeir Böðvarsson og Sif Jóhannesdóttir.

Sýningin stendur til septemberloka.

Þann 20.maí 2011 verður opnuð sýningin "Geimfarar í Þingeyjarsýslum" í Safnahúsinu.

Árið 1965 kom hópur starfsmanna Bandarísku geimferðastofnunarinnar NASA hingað til lands. Í hópnum voru geimfaraefni stofnunarinnar, þeirra á meðal Buzz Aldrin sem steig annar manna fæti á tunglið. Þeir fóru til æfinga og skoðuðu náttúru í Þingeyjarsýslum, sérstaklega við Mývatn og í Öskju. Tveim árum síðar árið 1967 kom annar hópur frá NASA og meðal geimfaraefna í þeim hóp var Neil Armstrong. Af þeim 12 mönnum sem hafa stigið fæti á tunglið komu 9 í sýslurnar okkar til að æfa sig og læra jarðfræði undir handleiðslu Íslenskra jarðvísinadamanna. Með í för voru hérlendir blaðamenn sem skráðu ferðasöguna og tóku mikið af myndum.

Náttúrufræðistofnun Íslands lánar tunglstein sem Íslenska ríkið fékk að gjöf frá Bandaríkjunum í kjölfar tunglferðanna til sýningarinnar. Ásamt steininum er íslenskur fáni sem flogið var með til tunglsins og aftur til baka á sýningunni.

Þann 11.febrúar verður opnuð ný sýning í sýningarsalnum á jarðhæð Safnahússins.

Sýndar verða:

-Ljósmyndir af húsum og götumyndum úr ljósmyndasafni Safnahússins - Tímalína.
-Sýnishorn af skipulagsvinnu bæjarins.
-Sýn ungmenna á það hvernig hús breytast.
-Sýningarstjóri: Arnhildur Pálmadóttir

Sýningin verður opin alla virka daga 10:00-17:00.

Þann 11.febrúar verður opnuð ný myndlistarsýning í sýningarsalnum á efstu hæð Safnahússins. Sýnd verða verk úr myndlistarsafni Safnahússins eftir Rögnu Hermannsdóttur. Verk Rögnu hafa einu sinni áður verið sýnd í Safnahúsinu. Það var árið 1985 þegar hún var ennþá í námi í Hollandi. Þá sýndu hún tréristur.

Sýningin verður opin alla virka daga 10:00-16:00.