Forsíða Sauðaneshús
Auglýsing

Sarpur

Auglýsing
Auglýsing
Sauðaneshús
Þriðjudagur, 07. september 2021 00:00

Sauðaneshús

Sauðaneshús um 1900Sauðanes á Langanesi er fornfrægur kirkjustaður, 7 km norðan við Þórshöfn

Prestsbústaðurinn á Sauðanesi, Sauðaneshús, er elsta steinhús í Þingeyjarsýslum. Það var byggt árið 1879 úr grágrýti sem flutt var langt að og höggvið á staðnum. Hlaðin steinhús af þessu tagi eru afar sjaldgæf á Íslandi og er Sauðaneshús því nánast einstakt á landsvísu. Í kringum 1957 fór Sauðaneshús í eyði og stóð það kalt og yfirgefið í nærri 40 ár. Um 1990 var ákveðið að endurreisa húsið. Það var mikið verk enda húsið að hruni komið og þurfti því að reisa það aftur næstum frá grunni, stein fyrir stein, fjöl fyrir fjöl. Við endurgerðina, sem tók 11 ár, var reynt að nýta það sem enn var heilt og lögð áhersla á að nálgast eins og hægt var upprunalega mynd hússins.

Í dag hýsir Sauðaneshús sýninguna “Að sækja björg í björg”. Fyrri hluti þeirrar sýningar var opnaður sumarið 2020 og seinni hlutinn sumarið 2021. Á sýningunni má fræðast um lífið á Langanesi á þeim tíma sem búið var í Sauðaneshúsi og hvernig prestsbústaðurinn var í raun miðpunktur samfélagsins á svæðinu. Margt merkilegt fólk tengist Sauðanesi og eru upplýsingar um nokkra einstaklinga á sýningunni, auk þess sem fjallað er almennt um ýmis störf, til dæmis prestfrúarhlutverkið og stöðu vinnufólks.

Langanes er gjöfult af náttúrulegum auðlindum á borð við rekavið og fjölbreytt fuglalíf og sýningin miðlar því hvernig fólk nýtti sér það sem nærumhverfið hafði upp á að bjóða til þess að lifa af. Náttúran er órjúfanlegur hluti lífsins á Langanesi og því er hún höfð í fyrirrúmi á sýningunni með sérstaka áherslu á fuglalífið á svæðinu.

 

SauðaneshúsSauðaneshús er hluti af húsasafni Þjóðminjasafns Íslands en rekið af Menningarmiðstöð Þingeyinga og er opið fyrir gesti yfir sumartímann.

 
 
Auglýsing
Auglýsing
Auglýsing
Auglýsing